آپ کتنے پرکشش ہیں؟

انگلیاں انسان کو روزمرہ کے کام کاج میں ہی مدد فراہم نہیں کرتیں بلکہ وہ پرکشش شخصیت کا ایک اہم حصہ بھی ہیں۔ ایک حالیہ سائنسی مطالعے سے ظاہر ہوا ہے کہ مرد کی چوتھی انگلی کی لمبائی یہ تعین کرنے میں مدد دیتی ہے کہ اس کی شخصیت خواتین کے لیے کتنی جاذب نظر ہے۔

 

کیا آپ کی شخصیت پرکشش اور جاذب نظر ہے؟

اس سوال کا جواب حقیقی جواب دے سکتی ہیں بے دھیانی میں آپ کی جانب اٹھنے والی آنکھیں۔  اچھا نظر آنا اور بالخصوص صنف مخالف کی نظروں کو بھانا ہر انسان کی ایک فطری خواہش ہے اور یہی وہ خواہش ہے جس کے دم سے  کاسمیٹکس کی صنعت کھربوں ڈالر کی انڈسٹری بن چکی ہے۔

حسن دو طرح کا ہوتا ہے ایک وہ جو منہ پر پانی کا چھینٹا مارتے ہی دھل جاتا ہے  اور دوسرا وہ جو زیور اور زیبائش کا محتاج نہیں ہوتا اور عمر بھر قائم رہتاہے۔

 

 

ماہرین کا کہنا ہے کہ حسن کا تعلق رنگت سے ہے نہ ناک نقشے سے، بلکہ حسن تناسب کا نام ہے۔ الگ سے اچھی دکھائی نہ دینے والی چیز، اگر چند دوسری چیزوں کے ساتھ تناسب سے رکھی ہوتو آنکھوں کو بھانے لگتی ہے۔

کچھ عرصہ پہلے دنیا کی حسین ترین شخصیات کی تصویروں کو جب کمپیوٹر کے ذریعے پرکھا گیا تو پتا چلا کہ ان کے چہرے کی ساخت، آنکھ، ناک، کان اور دہن میں تناسب موجود تھا اور جس کا تناسب جتنا بہتر تھا، وہ چہرہ اتنا ہی حسین اور پرکشش تھا۔

کیا آپ دوسروں کے لیے پرکشش اور جاذب نظر ہیں ؟  یہ جاننے کے لیے آپ کو آئینہ دیکھنے کی ضرورت ہے اور نہ ہی کسی سے پوچھنے کی جاجت۔  اس سوال کا جواب موجود ہے آپ کی اپنی انگلیوں کے پاس۔ جس طرح ایک پامسٹ ہاتھ کی لکیریں دیکھ کر آپ کے مستقبل  کی پیش گوئی کرسکتا ہے،  اسی طرح اپنے ہاتھ کی چوتھی انگلی پر نظر ڈال کر آپ یہ اندازہ لگا سکتے ہیں کہ آپ کی شخصیت دوسروں کے لیے کتنی پرکشش اور جاذب نظر ہے۔

حال ہی میں یونیورسٹی آف جنیوا میں  کی جانے والے ابک سائنسی مطالعے سے ظاہر ہوا ہے کہ مرد کے ہاتھ کی چوتھی انگلی ، دوسری انگلی کے مقابلے میں جس نسبت سے بڑی ہوگی، اس کا چہرہ صنف مخالف کے لیے اتنا ہی پرکشش ہوگا۔

 

 

چوتھی انگلی کو انگوٹھی کی انگلی بھی کہا جاتا ہے جب کہ دوسری انگلی بالعموم شہادت کی انگلی کہلاتی ہے۔

ڈاکٹر کیملی فرڈینزی کی سربراہی میں  ہونے والی اس تحقیق کے دوران 49 رضاکار مردوں کی چوتھی اور دوسری انگلیوں کی لمبائی کی پیمائش کی گئی اور ان میں پایا جانے والا تناسب ریکارڈ کیا گیا۔

اس کے بعد ان مردوں کی تصویریں مختلف  خواتین کے سامنے رکھی گئیں اور ان سے کہا گیا کہ وہ مردانہ وجاہت اور کشش کے لحاظ سے تصویروں کی درجہ بندی کریں۔

جب  اس درجہ بندی کا موازنہ چوتھی انگلی کی لمبائی سے کیا گیا تو ماہرین کو پتا چلا کہ جن مردوں کی چوتھی انگلی ، دوسری انگلی کی نسبت زیادہ لمبی تھی، خواتین  نے انہی کو پرکشش قرار دیاتھا۔ دلچسپ بات یہ ہے انگلی کی لمبائی کا تناسب جتنا زیادہ تھا، وہ چہرہ خواتین کے لیے اتنا ہی زیادہ پرکشش تھا۔ جب کہ خواتین کو انگلیوں کی ساخت کے بارے میں کچھ نہیں بتایا گیا تھا۔

تحقیق کے دوران خواتین کو ایک سوال نامہ مکمل کرنے کے لیے کہا گیا جس میں ایک یہ سوال بھی موجود تھا کہ ان تصویروں میں سے وہ کس مرد کو اپنا جیون ساتھی چننا پسند کریں گی۔ انہوں نے جن تصویروں کا انتخاب کیا، وہ انہی مردوں کی تھیں جن کی چوتھی انگلی نمایاں طور پر لمبی تھی۔ جب کہ خواتین کو مردوں کی مالی حیثیت وغیرہ کے بارے میں بھی بتایا گیا تھا۔

 

 

ڈاکٹر فیردنزی کا کہنا ہے کہ ہمیں اپنی تحقیق سے یہ پتا چلا ہے کہ خواتین نے لمبی چوتھی انگشت کے مردوں کو اس لیے بھی پسند کیا کیونکہ ان میں مردانہ وجاہت بھی زیادہ تھی۔

اس سے قبل ایک اور سائنسی مطالعے سے یہ ظاہر ہوچکا ہے کہ مردوں کی چوتھی انگلی کی لمبائی جتنی زیادہ ہوتی ہے ، ان میں جنسی ہارمونز کی مقدار بھی اتنی ہی زیادہ ہوتی ہے۔ ماہرین کا کہنا ہے کہ ہارمونز کی مقدار مردوں کی شخصیت پر اثرانداز ہوتی ہے اور زیادہ ہارمونز انہیں زیادہ پرکشش بناتے ہیں۔

کچھ عرصہ پہلے انگلیوں کی لمبائی سے متعلق ایک اور  تحقیق سے یہ معلوم ہوا تھا کہ اسٹاک ایکس چینج اور دیگر کاروباری اداروں کی کامیاب شخصیات کی چوتھی انگلی کی لمبائی غیر معمولی طورپر زیادہ تھی۔

ڈاکٹر فیرونزی کا یہ بھی کہنا تھا کہ صرف انگلیوں کی ساخت اور لمبائی سے  ہی جنسی ہارمونز کی مقدار کا تعین نہیں ہوتا، بلکہ پسینے کی مخصوص بو اور آوا ز سے بھی اس کی جانچ کی جاسکتی ہے۔  لیکن یہ وہ چیزیں ہیں عمر بڑھنے اور بلوغت کے بعد مرد میں ظاہر ہوتی ہیں،  جب کہ  انگلیاں ماں کی کوکھ سے ہی بچے کے ساتھ آتی ہیں۔

VOA